Guigal er eitt virtasta vínhús Frakklands og þekktast er það fyrir hin tignarlegu einnar ekru vín sín frá Cote Rotie, en þau teljast til bestu og eftirsóttustu vína veraldar. 

Rétt eins og rauða Côtes du Rhône vínið hefur hið hvita frá Guigal sérstöðu að því leytinu til að ólíkt flestum vínum sem bera þessa skilgreiningu þá er stíllinn miklu meira í ætt við norðurhluta Rhône-dalsins en suðurhlutans. Í tilviki rauða vínsins þýðir það að Syrah-þrúgann er í aðalhlutverki en í tilviki þess hvíta að það er Viognier sem setur tóninn umfram aðrar þrúgur. Vínið minnir að mörgu leyti eiginlega meira á vín frá þorpinu Condrieu en vín sem skilgreind eru sem Côtes du Rhône.

Skemmtilegur þrúgukokteill þar sem Viognier er þó ávallt í meirihluta. Gullið tær litur, ferskur ilmur af hvítum blómum, seyðandi angan af apríkósum, akasíu og hvítum ferskjum, örlítið kryddað, ávaxtaríkt í munni hefur það góðan þéttleika, svolítið feitt og mjúkt og með fína sýru og nokkuð míneralískt, mikill karakter, frábært jafnvægi. Algjörlega óeikað vín til halda í ferskleikann.