Brio er “sécond” eða það sem kallað er annað vínið frá Château Cantenac Brown í Margaux í Bordeaux. Það verður ekki af Brio skafið að það er nær undantekningarlaust frábært og gefur manni kost á að fá alvöru Bordeaux af Grand Cru ekrum fyrir töluvert minni peninginn en “stóru” Château-vínin. Brio er unnið úr berjum af yngri vínvið og er yfirlett aðgengilegra og ánægjulegra mun fyrr en ”stóri bróðir”.

Blandan í Brio er klassísk Médoc-blanda, 40% Cabernet Sauvignon, 49% Merlot og afgangurinn Cabernet Franc. Þetta er líka skólabókar Médoc. Dökkt ber, þroskuð sólber, svört kirsuber og skógarber, pipar, vindlatóbak, útihús, fjólur, jörð og krydd, góð fylling og þétt og fín tannín. Fínt til neyslu núna en mælt er með umhellingu 1-2 klst. áður en vínið er borið fram, vínið mun endurgjalda það. 12 mánaðar eikarþroskun í 25% nýjum tunnum.