Þrúgurnar eru ræktaðar á runnum sem eru að meðaltali 70 ára gamlir í 750 metra hæð yfir sjávarmáli og ræktunin er án áveitu (dry farming). Þetta gamall vínviður gefur af sér vín sem eru massív og mikil. Cigales er tiltölulega óþekkt víngerðarsvæði á hásléttunni norð-vestur af Madrid, eiginlega rétt norður af öllu þekktara víngerðarsvæði, Ribera del Duero. Það bar lengi lítið á Cigales, þarna voru fyrst og fremst mjög litlir framleiðendur sem seldu vín sín í nágrenninu.

Þetta breyttist fyrir nokkrum árum þegar vínhúsið Baron de Ley í Rioja komst að þeirri niðurstöðu að þarna væru kjöraðstæður til fjárfestinga utan Rioja. Það sem ekki síst réði þessu vali Baron de Ley var aldur vínviðsins á ekrunum. Alls hefur vínhúsið keypt þarna tæplega 200 hektara af ekrum, þar sem vínviðurinn er eldri en sextíu ára. Finca Museum er nú langstærsti og nútímalegasti framleiðandi Cigales og vínin eru hrikalega flott. ( texti frá www.vinotek.is ).

Það er þrúgan Tinta del País sem er í raun Tempranillo nema með þykkara skinni. Eins og nafnið gefur til kynna er víngerðin einnig safn, með skúlptúrum og málverkum frá 17. öld. Djúp svarrautt að lit, svolítil rist og kryddjurtir í nef ásamt vott af lakkrís, þroskuð rauð vilt ber, bláber, plómur, sólber, balsamic og töluverð eik, reykur, vanilla og dökkt súkkulaði. Ljúffengur, snúinn og flókinn í kröftugu bragði, vel póleruð tannín, sýran fersk, míneralískt, langt of ljúffengt eftirbragð. Vínið er látið þroskast í 22 mánuði á franskri eik og 12 mánuði á flösku áður en það fer á markað.

Rauðvín frá Finca Museum