Eftir því sem vínið er geymt lengur á tunnu breytir það um lit, rauði liturinn tekur á sig brúna tóna og ávöxturinn víkur fyrir hnetum og möndlum. Þessi portvín eru kölluð Tawny með vísun í litarhátt þeirra. Skilyrði fyrir því að portvín megi skilgreina sem Tawny er að það hafi einungis verið látið þroskast á eikartunnum.

Ljósmúrsteinsrautt að lit með ilm og bragð af hunangi, hezlihnetum og kryddum. Minni sæta en í 10 ára Tawny. Mjög langt og heitt eftirbragð. Prófið þennan létt kældann með dessertum eins og crème brulée, Möndluköku eða ostum eins og Manchego eða Parmesan, einnig flott með Foie gras þar sem sýran sker sig fullkomlega með feitri lifrinni.

Douro-dalurinn í norðurhluta Portúgal er með fegurstu víngerðarhéruðum heims. Fljótið Douro hlykkjast um dalinn á lokasprett sínum að Atlantshafi og í bröttum hlíðunum berst vínviðurinn í grýttum jarðveginum á manngerðum syllum. Douro er auðvitað þekktast fyrir að vera hérað hinna styrktu vína, portvínanna, frægustu vína Portúgal.