Einhver bestu kaupin frá Montes er úr „Alpha“ línunni, eitt af fyrstu hágæðuvínum frá Chile. Þetta er vín í anda betri vína Médoc-héraðsins í Bordeaux. Verð þess er hins vegar mun hagstæðara en sambærilegra vína frá Bordeaux.  Það varð mikil breyting á sínum tíma þegar að vínið var gert úr þrúgum frá Colchagua-dalnum í stað Curico  og nú má greina aðra róttæka breytingu.  

Frá og með 2012-árganginum sem nú er að koma má greinilega byrja að greina þær breytingar sem orðið hafa með breyttri ræktun þar sem áveita er skorin nær alveg niður. Þessi aðferð, sem kölluð er “dry farming”  hefur m.a. í för með sér að ræturnar teygja sig enn lengra niður, berjaklasarnir verða minni og  hlutfall þrúguhýðis á móti þrúguávexti fer úr 12% í 37%.

Bragðmikið vín með fínlegri en jafnframt flókinni uppbyggingu þar sem þroskaður sólberjaávöxtur, brómber, skógarber, tóbakslauf og vanillukennd frönsk eik leika aðalhlutverkið. Einnig er áberandi steinefni, svartur pipar, vindlakassi og mokkakaffi, þykkt og mikið í munni, þétt tannín og fáguð flauelsmjúk ending. 12 mánaða eikarþroskun í nýrri og notaðri franskri eik.