Þrúgurnar í þessu víni eru klassískar Rhone-blöndu þrúgur, Shiraz og Mourvedre ásamt hinni fágætu Bordeaux-þrúgu Petit Verdot. Þær eru hins vegar ræktaðar á vínekrum Suður-Afríku og þetta er eitt af vínunum frá Distell, sem er einn stærsti aðilinn í suður-afrískri víngerð og ræður yfir mörgum af bestu vínhúsunum þar. Þessi blanda mun upphaflega hafa verið sett saman fyrir markaðinn í Vesturheimi og er bara hið ágætasta vín miðað við verð. Dökkt með dökkum og svolítið sætum og þroskuðum ávexti, sultaður rauður berjaávöxtur, kirsuber, plóma, kaffi, tóbak og vanillu frá eikinni.  Mild sýra og tannín.  Vín sem hentar vel með grilluðu rauðu kjöti og sterkkrydduðum mat.