Late Bottled Vintage Port oft nefnd LBV eru árgangsvín sem eru síuð og sett á flösku fjögurra til sex ára gömul og þroskast þá ekki frekar. Yfirleitt eru þetta vín í mjög háum gæðaflokki sem eru notuð í LBV. Þau urðu fyrst til á sjötta áratug síðustu aldar þegar vínhúsin sátu uppi með meira magn af víni í Vintage-gæðum en þeim var heimilt að nota í Vintage. Hver árgangur af Vintage má ekki vera meira en 72 þúsund lítrar (sem er ein risastór áma) og því var afgangurinn notaður í LBV. Síðan hafa þessi vín öðlast fastan sess. Graham’s er eitt af klassísku portvínshúsunum og stíll hússins er fágaður og elegant.

Djúp rúbínrautt að lit, ilmríkt nef sem pakkað er að rauðum og svörtum skógarberjaávexti. Í munni öflugt bragð af svörtum kirsuberjum, bláberjum, sveskju og sólberjum í góðu jafnvægi við þétt og mild tannin. Mikil fylling, langt, heitt og sætt í munni. Frábært með súkkulaði eftirréttum og hörðum osti eins Cheddar og jafnvel geitaosti.

Douro-dalurinn í norðurhluta Portúgal er með fegurstu víngerðarhéruðum heims. Fljótið Douro hlykkjast um dalinn á lokasprett sínum að Atlantshafi og í bröttum hlíðunum berst vínviðurinn í grýttum jarðveginum á manngerðum syllum. Douro er auðvitað þekktast fyrir að vera hérað hinna styrktu vína, portvínanna, frægustu vína Portúgal.