Emilio Moro sem hefur aðsetur í smáþorpinu Pesquera er eitt af helstu vínhúsunum í Ribera del Duero, einhverju besta rauðvínshéraði Spánverja. Vínþrúgan í Ribera heitir Tinto Fino og er í raun sú sama og víða annars staðar, t.d. í Rioja, er nefnd Tempranillo.  Resalso er yngsta vínið úr smiðju Emilio Moro, vínviðurinn er aðeins yngri en í stóru vínunum og vínið er geymt skemur á tunnu áður en það fer á flösku.

Mjög dökkt svarfjólurblátt að lit, djúpur, opinn og ilmríkur ávöxtur af þroskuðum dökkum berjaávexti, bláber, mórber og sultaðar plómur ásamt vanillu og lakkrís. Í munni er ávöxturinn þykkur með smá sætri áferð, þétt tannín, eik og kaffi bætast við bragðflóruna í annars löngu og þægilegu eftirbragði.  Vínið er enn mjög ungt, þarf tíma til að ganga betur saman, því er um að gera að umhella því ef þið nennið ekki að geyma flöskuna í 1-2 ár.

Ribera del Duero vín eru kannski helst þekktust fyrr stór, mikil og eikuð vín, mörg vínhúsin hinsvegar framleiða einnig yngri vín eða svokölluð Joven vín þar sem áherslan er á ávöxtinn. Þetta vín fær stutta eikarþroskun eða 4 mánuði í franskri eik.  Resalso er þó alla jafna eitt af þeim rauðvínum sem hér eru fáanleg sem gefur hvað mest fyrir peninginn.