Domaine de Villemajou er einstaklega fallegt vínhús í hjarta Corbiéres svæðisins sem nefnist Boutenac. Georges Bertrand faðir Gérard festi kaup á þessari 130 hektara eign árið 1970. Villemajou er rekið sem sjálfstæð eining og hefur töluvert annan karakter en mörg önnur Bertrand-vín. Þar er að finna mjög gamlan vínvið af Carignan sem gefa vínum hússins einstök gæði. Þetta vín er blanda þriggja þrúgutegunda: Carignan, Syrah og Grenache. Þrúgurnar eru sérvaldar og handtíndar af vínekrunum og víngerðin sjálf er sérhæfð hverri berjategund og tekur hún 16-20 daga. Síðan er vínið látið taka út þroska sinn á 225 lítra eikartunnum í ca 12 mánuði.

Það býr yfir þéttum, fjólurauðum lit og hefur meðalopinn, kryddaðan ilm sem minnir á sultuð jarðar- og hindber, bláberjasultu, toffí, vanillu, sveskjur, sprittlegin kirsuber, kakó, tímjan, rósmarín og portvín. Það er svo bragðmikið með töluverða frískandi sýru, þurrt og voldugt þrátt fyrir þennan sæta ávöxt svo jafnvægið verður afar gott. Það hefur póleruð tannín og keim af sultuðum bláberjum, jarðarberjum, toffí, mokka, Mon Chéri-molum, þurrkuðum ávöxtum, vanillu og kryddjurtum. Frábært matarvín, reynið með íslenska lambinu og nauti, mildari villibráð eins og hreindýr og gæs.