Chryseia er toppvínið í samvinnuverkefninu P+S sem stendur fyrir samstarf vínfjölskyldnanna Prats og Symington. Bruno Prats var löngum eigandi Chateau Cos d’Estournel í Bordeaux og Symington-fjölskyldan hefur verið einu sú áhrifamesta í Douro í Portúgal um langt skeið og á m.a. portvínshúsin Graham’s og Dow’s. Symingtonarnir höfðu um langt skeið átt hlut í einu besta portvínshúsi Douro-dalsins, Quinta de Roriz og eignuðust það alveg ásamt Prats árið 2009.

Fjölskyldurnar þekktust vel í gegnum samstarf á vettvangi Primi Famileum Vini, sem eru samstarfsvettvangur nokkurra af þekktustu vínfjölskyldum heimsins. Sú vinátta varð til þess að Prats og Symington ákváðu 1999 að taka höndum saman um framleiðslu á víni þar sem aðferðum Bordeaux væri beitt á þrúgur portvínshéraðsins Douro.

Fyrsta Chryseia-vínið var gert árið 2000 og það skipaði sér strax í hóp bestu rauðvína Portgúal. Chryseia 2011 varð þannig fyrsta vínið frá Portúgal – sem ekki er portvín – sem komst inn á árlegan lista Wine Spectator yfir bestu vín heims og þá í þriðja sæti. Vínið er gert úr þrúgunum Touriga Franca og Touriga Nacional og 2018 voru hlutföllin 55/45.

Það er svarblátt á lit, þykkur og magnaður svartur berjaávöxtur í nefi, sólber og krækiber, fjólur og ristað kaffi, eikin er áberandi en vel samofin ávextinum. Í munni er það massívt, þéttriðið með kröftugum en fínlegum tannínum, ferskt og míneralískt. Einstaklega tignarlegt vín. texti www.vinotek.is  Vín er látið þroskan í 15 mánuður á 400 lítra frönskum eikartunnum, ekki veitir af umhellingu.