Hospitalet er eitt af vínhúsunum í Suður-Frakklandi sem að Gerard Bertrand hefur fjárfest í á síðustu árum, ekra rétt við Miðjarðarhafið skammt frá Narbonne og þetta er sannkallað suður-franskt ofurvín. Landareignin er í hæðunum rétt vestur af borginni Narbonne og teygja ekrurnar sig þar í átt að Miðjarðarhafinu. Allt um kring eru ekrurnar umluknar klöppum (svæðið heitir meira að segja la Clape) þaktar garrigue-gróðri, villtum rósmarínrunnum og öðrum lágreystum gróðri sem að berst við að lifa af í þessu þurra og hrjóstruga umhverfi.

Yfirgengilega mikið, öflugt og samþjappað. Ekki fyrir alla, mörgum þætti þetta vín eflaust of mikið, of kröftugt. Vín verða ekki mikið öflugri og villtari en þetta.  Mjög dökkt að lit, þroskaðir dökkir ávextir, anís, ferskar kryddjurtir, kaffi, tóbak og malbik í nefi, þarna er mikil jörð angan af garrigue, kryddum og blómu Miðjarðarhafsins, feitt, heitt og öflugt í munni, kryddað og langt eftirbragð. Vín sem þarf álíka kröftugan mat, villibráð, bragðmikla osta eða pottrétti þar sem kjöt er eldað í víni, t.d hægeldaðir lambaskankar.