Munurinn á Chablis og Petit Chablis er landfræðilegur og það fer eftir því hvar á Chablis-svæðinu ekrurnar eru undir hvaða skilgreiningu vínin lenda. Petit Chablis-vínin eru yfirleitt ferskari, meira út í ávöxt en steinefni en Chablis-vínin. Pas si Petit þýðir einfaldlega "ekki svo lítill".

Ljóssítrónugulur að lit, ferskur ilmur af sítrusávöxtum þó aðallega af appelsínu ásamt vott af steinefnum. Létt meðalfylling í munni þar sem sítrusávöxturinn skilar sér vel ásamt snert af eplum, þurr og fersk sýra.

Vínsamlagið Chablisienne er stærsti framleiðandi Chablis-vína. Samlagið var sett á laggirnar árið 1923 og í dag eiga um 300 vínræktendur aðild að því. Ræður samlagið yfir um 25% af heildarræktarsvæði Chablis og framleiðir allt frá Petit Chablis og upp í Grand Cru. Hin fræga vínkeppni “ International Wine Challenge” útnefndi Vincent Bartement aðalvíngerðarmaður La Chablisienne besta hvítvínsgerðarmann ársins 2014 í heiminum.