Guado al Tasso er eitt af vínhúsum markgreifans Antinori.  Það er staðsett í Bolgheri við vesturströnd Toskana og er þekktast fyrir rauðvínið sitt sem er eitt af þekktustu Súper-Toskana-vínunum. Þorpið Bolgheri er vissulega bara lítið og krúttlegt sveitaþorp en vínin af ekrunum í kringum það eru engin smásmíði. Hér eru vínin oftar en ekki gerð úr frönsku Bordeaux-þrúgunum og þekktust eru vín á borð við Sassicaia, Ornellaia og svo auðvitað Antinori-vínði Guado al Tasso.

Piero Antinori og yfirvíngerðarmaður hans Renzo Cotarella hafa gert Guado al Tasso að einu helsta djásni Antinori-fjölskyldunnar og einhverju besta víni Bolgheri. Þetta vín hrífur mann með krafti sínum og ákveðni, mokka, balsamic, sæt krydd, plómur, brómber og jurtir umvefja munninn. Mjúk og afskaplega elegant þrátt fyrir svaðaleg tannín og kraft.

Guado Al Tasso vínið er framleitt eins og fínustu vín Bordeaux og er í sambærilegum gæðum þó ekki sé meira sagt, þetta er vín sem vel má geyma í áratug.