Vínsamlagið Chablisienne er stærsti framleiðandi Chablis-vína. Samlagið var sett á laggirnar árið 1923 og í dag eiga um 300 vínræktendur aðild að því. Ræður samlagið yfir um 25% af heildarræktarsvæði Chablis og framleiðir allt frá Petit Chablis og upp í Grand Cru. Hin fræga vínkeppni “ International Wine Challenge” útnefndi Vincent Bartement aðalvíngerðarmaður La Chablisienne besta hvítvínsgerðarmann ársins 2014 í heiminum. 

Grenouilles (eða froskarnir) er minnsta Grand Cru-ekran og er allveg einstök, einungis 9,4 hektarar og af því á La Chablisienne 7,2 hektara.

Fölgyllt að lit, ferskt og flókið nef og bragð, vanilla, ferskir ávextir, hvít blóm, mjúkir kryddtónar, sítrónella, verbena, hunangsvax og mjög míneralískt, kalk og blautir steinar, ótrúlegt jafnvægi í þessu víni, fínlegt og elegant í löngu eftirbragði, mikil gleði sem skilja eftir sig minningar.